Jēkabs Slišāns- "Jauniešu gada balva-2023" nominants!
25. februāris, 2024 pl. 19:36,
Nav komentāru
2. februarī Bolvūs nūtyka nūvoda “Jauniešu gada balva 2023” apbolvuošonas pasuokums. Baļtinovas v-škola apbolvuošonai beja nominejuse Jēkabu Slišānu (7.kl.). Jēkabs gon nadabova golvonū bolvu, bet tys namazynoj juo sasnāgumus i baļtinovīšu prīcu, sveicūt Jēkabu skaistajā pasuokumā! Gondarejums, ka myusim ir taidi jaunīši! Paļdis Jēkabam, paļdis juo vacuokim!
Jēkabs ir radūšs, aktivs, talanteigs, daudzpuseigs latgaļu puiss. Jam ir cīši lobas sekmes muoceibuos, jis pīzadola daudzuos aktivitaties uorpus školas. Ir folkloras kūpas “Upīte” daleibnīks, aktivs Upītes kulturas centra pasuokumu daleibnīks. Baļtinovas Muzykas i muokslas školā vuicuos akordeona spieli. 2023./2024.m.g. īvālāts Baļtinovas v-školas Školānu padūmē. 2023.godā panuokumi nūvoda matematikas olimpiadē, vaļsts mārūgā atzineiba matematikas konkursā “Ķengurs”. Jēkabs školā pīzadola folkloras, kūkapstruodes, latgalīšu volūdas puļceņūs.
Jēkaba aizaraušona ir komiksu zeimuošona, juo talants izapauž vysaidu pasuokumu, aktivitašu ilustracejos.
Daži fakti par Jēkabu. 2023.godā kūpā ar folkloras kūpu “Upīte” pīzadola folkloras festivalūs Kosovā, Čehejā, Pūlejā; ilustrej Ontona Slišāna puosokas, kuras publicātas YouTobe; veidoj afišas dieļ Upītes TN; izveidoj pasuokuma “Gūdi” nominaceju vizualizacejas; ilustrej CD Viļānu kapelai “Bumburneicys”; ilustrej Zinta Krakopa dzīsmes dieļ socialūs teiklu; folkloras kūpai “Upīte”veidoj videoklipu animaceju “Kara laukā”. Itymā laikā vieļ turpynojuos dorbs, kur Jēkabs ilustrej Ontona Slišāna puosoku gruomotu, kurā byus ap 100 (!) Jēkaba zeimejumu.
I vieļu vysu kū cytu varātu turpynuot...
Imants Slišāns, Baļtinovas v-školas dkirektors